SEO MOSEBETSI E MONG LE E MONG A LOKELANG HO SE TSEBA MALEBANA LE BOPHELO BO BOTLE LE POLOKEHO MOSEBETSING
Tataiso ena e ngotswe malebana le bophelo bo botle le boipaballo ba basebetsi naheng ya Afrika Borwa. Ha e a rerelwa ho sebediswa sebakeng sa Molao wa selemo sa sekete, makgolo a robong, mashome a robong a metso e meraro wa Bophelo bo botle le Polokeho mesebetsing. E reretswe ho hlalosa Molao ona ka mantswe a bonolo ao eseng mantswe a sebediswang molaong bakeng sa bohle ba amehang mona mererong ya bophelo bo botle le polokeho mona Afrika Borwa.
Seabo sa bahlahlobi ba bophelo bo botle le boipaballo mesebetsing ba Lefapha la Mesebetsi se hlalositswe. Mesebetsi le ditokelo tsa basebetsi jwalo ka ha di hlalositswe ke molao bakeng sa basebetsi bana e hlalositswe. Ho totobatswa seabo le boikarabelo ba boramesebetsi, bahlahisi, bataki, baamohedi ba tse tswang ka ntle, batshehetsi le barekisi bakeng sa ho etsa bonnete ba hore basebetsi ba na le bophelo bo botle le polokeho mosebetsing. Qetellong ho hlaloswa mesebetsi ya baemedi ba bophelo bo botle le polokeho esita le tsona dikomiti.
Molao wa selemo sa sekete, makgolo a robong, mashome a robong a metso e meraro wa Bophelo bo botle le Polokeho mesebetsing o batla hore ramosebetsi a tlise le ho baballa ka hohle ka moo a ka kgonang ka teng maemo a bolokehileng mme a hlokang dikotsi malebana le bophelo ba basebetsi mosebetsing. Hona ho bolela hore monnga mosebetsi o lokela ho hlokomela hore sebaka sa tshebetso ha se na letho le ka bang kotsi jwalo ka benzene, tlelorine le dikokwanyana tse nyenyane haholo, dintho, thepa, le tshebetso e itseng, jwalojwalo, e leng tse ka bakang kotsi, tshenyo kapa mahloko. Ha eba tsena di le boima ho etsahala, monnga mosebetsi o lokela ho tsebisa basebetsi ka dikotsi tsena, ka moo di ka qojwang ka teng, ka moo ho ka sebetswang ka polokeho ka teng, le ho fana ka mekgwa e meng hape ya boipaballo malebana le sebaka se bolokehileng sa mosebetsi.
Le ha ho le jwalo, ha ho a lebellwa hore e be monnga mosebetsi feela a le mong ya bang le boikarabelo bakeng sa bophelo le polokeho. Molao o beilwe ka kutlwisiso ya hore dikotsi mesebetsing di lokela ho fediswa ka puisano le tshebedisano pakeng tsa basebetsi le monnga mosebetsi. Basebetsi le monnga mosebetsi ba lokela ho thusana ka ho ba le boikarabelo malebana le bophelo le polokeho mosebetsing. Mekga ena e mmedi ya batho e lokela ho lemoha dikotsi tse ka bang teng le ho hlahisa mekgwa eo di ka fediswang ka yona e le ho etsa hore mosebetsing ho be le paballo le polokeho. Ka tsela ena, monnga mosebetsi le basebetsi ba na le seabo tseleng ya tshebetso moo baemedi ba bophelo le polokeho ba tla hlahloba sebaka sa tshebetso kgafetsa mme ba etse pehelo e lebiswang komiting ya bophelo le polokeho eo yona e tla etsa dikgothaletso tse tla iswa ho monnga mosebetsi.
E le ho etsa bonnete ba hore tshebetso ena e a phethahala, mosebetsi e mong le e mong o lokela ho tseba ditokelo le mesebetsi ya hae jwalo ka ha e hlalositswe Molaong.
Molao le Melawana
Molao wa selemo sa sekete, makgolo a robong, mashome a robong a metso e meraro wa Bophelo bo botle le Polokeho mesebetsing (Molao wa mashome a robedi a metso e mehlano wa selemo sa sekete, makgolo a robong, mashome a robong a metso e meraro) o na le dikarolo tse mashome a mahlano tse dumelletsweng ke Palamente. Sepheo ka molao ona ke ho hlokomela hore ho be le bophelo le polokeho ya basebetsi mesebetsing esita le ho sebedisa disebediswa le yona metjhini. Ho feta mona molao ona o ntse o bile o hlokomela polokeho ya batho ba hlahang ka lebaka kapa ka kamano le seo batho ba sebetsang ba se etsang.
Melawana e mengata e hlahang ka dihlooho tse ikgethileng e amohelwa le ho kenyeletswa Molaong ona ke Letona la Mesebetsi.
Molao kapa Melawana ena e ka rekwa Kgatisong ya Mmuso e le Koranta ya Mmuso kapa e le bukana e etswang ke dikgatiso tse fapaneng.
Lefapha la Mesebetsi
Bolaodi bo phahameng ba Bophelo le Polokeho Mosebetsing
Molao wa Bophelo bo botle le Polokeho mesebetsing o laolwa ke Bolaodi bo phahameng ba Lefapha la Mesebetsi la Bophelo bo botle le Polokeho mesebetsing.
E le ho etsa bonnete ba hore ho na le bophelo bo botle le polokeho mesebetsing bakeng sa basebetsi, ho theilwe diofisi Porovenseng e nngwe le e nngwe. Ka lebaka lena, bahlahlobi ba bophelo bo botle le polokeho mosebetsing ba tswang diofising tsena ba hlahloba le ho etsa diphuputso dibakeng tsa mesebetsi.
Dihlahlobo
Dhlahlobo di rerwa ho latela dipalopalo tsa dikotsi tse hlahileng, ho ba teng ha dintho tse kotsi tse kang benzene moo ho hlatswetswang kapa tshebediso ya metjhini e kotsi dibakeng tse fapaneng tsa mesebetsi. Dihlahlobo tse sa rerwang tsa tshohanyetso le tsona ka lehlakoreng le leng le tsona hangata di etswa ka lebaka la kopo kapa ditletlebo tsa basebetsi kapa batho ka hara setjhaba se itseng. Ditletlebo le dikopo tsena di nkuwa e le sephiri mme di sebetswa ka lenyele.
Matla a bahlahlobi
Ha eba mohlahlobi a ka lemoha maemo a kotsi kapa a hlobaetsang mosebetsing, a ka tsebisa monnga mosebetsi tseo a lokelang ho di etsa ka mekgwa ena e latelang:
Tsebiso ya thibelo
Mohlahlobi a ka thibela ketso e itseng, tshebetso e itseng, kapa tshebediso ya motjhini kapa thepa e itseng ka ho sebedisa tsebiso ya thibelo ha ho bonahala hore ho tla hlaha kotsi. Ha ho motho ya ka iphapanyang se bolelwang tsebisong eo ya thibelo mme se bolelwang tsebisong eo ya thibelo se lokela ho phethahatswa ka potlako e kgolo.
Tsebiso ya tlolo ya molawana
Ha eba ho na le molawana o tlotsweng, mohlahlobi a ka sebedisa tsebiso ya tlolo ya molawana ho basebetsi kapa yena monnga mosebetsi. Tlolo ya Molao yona e ka qetella e bakile hore motho a tshwarwe empa ha eba molawana o tlotswe, monnga mosebetsi a ka fuwa monyetla wa ho lokisa phoso eo nakong e boletsweng tsebisong eo ya tlolo ya molawana eo hangata e yeng e be matsatsi a mashome a tsheletseng.
Tsebiso ya ho ntlafatsa
Ha eba mekgwa ya bophelo bo botle le polokeho eo monnga mosebetsi a e sebedisang e sa kgotsofatse bakeng sa ho baballa bophelo le polokeho ya basebetsi, mohlahlobi a ka batla hore monnga mosebetsi a ntlafatse ka ho sebedisa mekgwa e meng e lokileng. Tsebiso ena e bolelang se lokelang ho etswa esita le mekgwa e lokelang ho sebediswa, e tla fuwa monnga mosebetsi hore a sebetse ka yona.
Matla a mang / boikarabelo
E le ho thusa mohlahlobi ho ntshetsa pele mesebetsi ya hae, a ka fihla sebakeng sefe kapa sefe sa tshebetso moo ho sebediswang metjhini kapa dintho tse kotsi a hlokomedise kapa a laele hore batho ba etsang jwalo ba yo ikarabella ho yena. Mohlahlobi a ka laela hore tokomane e nngwe le e nngwe a e fuwe, a e hlahlobe, a e atise mme a batle le ditlhalosetso mabapi le se ngotsweng ditokomaneng tseo. Mohlahlobi a ka boela a hlahloba maemo afe kapa afe kapa hona ho nka mehlala ya matshwao a lefu mme a nke tokomane e nngwe le e nngwe e ka sebediswang e le bopaki.
Hlokomela: Matla ana a boletsweng a bahlahlobi ha se diqeto. Motho e mong le e mong ya sa dumeleng ka qeto e nkilweng ke mohlahlobi a ka ipiletsa kgahlano le qeto eo ka ho ngolla Mohlahlobi e moholo, Bophelo bo botle le Polokeho Mesebetsing, Lefapha la Mesebetsi, Mokotla wa Poraevete X117, Pretoria, 0001.
Mesebetsi e akaretsang ya bannga ba mesebetsi malebana le basebetsi ba bona
Ke eng seo monnga mosebetsi a lokelang ho se etsa e le ho etsa bonnete ba hore sebakeng seo ho sebetswang ho sona ho na le polokeho mme ha ho na dikotsi tse ka hlahelang basebetsi ba hae?
Monnga mosebetsi o lokela ho nehelana le ho baballa thepa e tshwanelang ho sebediswa ho phetha mosebetsi o itseng, le yona tataiso yohle ya ka moo mosebetsi o lokelang ho etswa ka yona le maemo a ke keng a ama bophelo le polokeho ya basebetsi hampe. Pele monnga mosebetsi a ka kgothaletsa tshebediso ya thepa ya boitshireletso, o lokela hore pele a tlose kapa a fokotse eng kapa eng e ka bang kotsi bophelong kapa boipolokong ba basebetsi. Monnga mosebetsi o lokela ho hlokomela hore a baballe bophelo le polokeho ya basebetsi ba hae kgahlano le kotsi e ka hlahang e ka bakwang ke tlhahiso, tshebetso, ho sebediswa, ho sebetsa ka dintho, ho boloka le ho tsamaisa thepa , ke ho re, ka mantswe a mang, ntho efe kapa efe eo basebetsi ba ka e sebedisang mosebetsing.
E le ho etsa bonnete ba hore mesebetsi ena e a phethwa, monnga mosebetsi o lokela ho:
ho lemoha ha eba ho na le dintho tse ka bang kotsi nakong eo ho ntseng ho sebetswa, ha eba ho na le ntho e hlahiswang, e sebediswang, e bolokwang kapa e tsamaiswang kapa thepa efe kapa efe e sebediswang ho fumana mekgwa ya boitshireletso e tshwanelang hore e ka sebediswa bakeng sa ho baballa basebetsi ba hae kgahlano le kotsi e bonahalang mme a fane ka tsela ya ho sebedisa mekgwa ena a fane ka tsebo e hlokehang, ditaelo, kwetliso le taolo mme a ntse a ela hloko bokgoni ba basebetsi. Ka mantswe a mang seo ba ka se etsang le seo ba sa tshwanelang ho se etsa.
ho se dumelle motho mang kapa mang ho tswela pele ka mosebetsi ofe kapa ofe ha ese ha mekgwa ena ya boipaballo e hlokometswe hantle.
ho etsa boikgathatso ele ho etsa bonnete ba hore motho e mong le e mong eo a mo laolang o ikobela se bolelwang Molaong ona ho laela hore mekgwa ya taolo e a sebediswa molemong wa bophelo bo botle le polokeho.
ho hlokomela hore mosebetsi o etswang le thepa e sebediswang e laolwa ke monnga mosebetsi ya kwetlisitsweng mme a tseba dikotsi tse ka hlahang mosebetsing monnga mosebetsi ya jwalo o lokela ho etsa bonnete ba hore mekgwa ya boipaballo e a sebediswa mme e a baballwa.
Basebetsi bohle ba na le tokelo ya ho tsebiswa
Monnga mosebetsi e mong le e mong o lokela ho hlokomela hore mosebeletsi e mong le e mong o na le tsebo mme o utlwsisa se bolelwang ka dikotsi tsa bophelo le boipaballo tse ka hlahang mosebetsing ofe kapa ofe o etswang, ntho efe kapa efe e hlahiswang, e sebediswang, e bolokwang, ka moo e sebediswang ka teng kapa e tsamaiswang ka teng kapa thepa efe kapa efe e sebediswang. Monnga mosebetsi o lokela ho ruta basebetsi ba hae ka mekgwa e ka sebediswang ho thibela dikotsi tsena.
Monnga mosebetsi o lokela ho tsebisa baemedi ba bophelo le polokeho ha mohlahlobi a mo tsebisa hore ho tla etswa dihlahlobo le diphuputso sebakeng sa hae sa mosebetsi. Monnga mosebetsi o lokela ho tsebisa baemedi ba bophelo le polokeho hape ka tshebediso ya dithibelo tse itseng kapa thibelo eo a e fuweng ho latela se bolelwang Molaong. Thibelo mona e bolela ho fuwa monyetla wa ho se tlole se bolelwang Molaong, melawaneng, ditsebisong kapa ditaelong tse hlahiswang ke Molao.
Monnga mosebetsi o lokela ho tsebisa baemedi ba bophelo le polokeho ka potlako ka ho ba teng ha ketsahalo e itseng sebakeng sa hae sa mosebetsi. Ka ketsahalo ena re bolela se ileng sa etsahala mme hona moo ha ba le motho ya bolawang, ya hlahang kotsi kapa ya kulang. Ho bolelwa hape ho qhalana ha khemikale e kotsi jwalo ka ha tanka ya ?formaldehyde? e dutla (ke sehlahiswa sa khemikale se hlahiswang indasetering) ka lebaka la ho dutla ha sekwahelo kapa ha motjhini o sa sebetse hantle empa motjhini oo o sa ka wa bolaya kapa ho lematsa mang kapa mang.
Mesebetsi ya bahlahisi, bataki, ba amohelang thepa e rometsweng, barekisi kapa batshehetsi malebana le tshebediso ya dintho tse itseng mosebetsing
Dintho tse sebediswang
Bahlahisi, bataki, bamohedi ba tse rometsweng, barekisi le batshehetsi ba lokela ho hlokomela hore:
dintho tsa bona di bolokehile mme ha di na kotsi bophelong mme di tsamelana le se hlokehang ha eba ho na le ntho e kenngwang sebakeng seo ho sebeletswang ho sona, e lokela ho etswa ka tsela e sa tlo hlahisa maemo a sa tsitsang kapa kotsi bophelong ba basebetsi.
Thepa
Bahlahisi, bataki, bamohedi ba thepa e rometsweng, barekisi le batshehetsi ba ntho efe kapa efe ba lokela ho etsa bonnete ba hore:
dintho tsa mofuta oo di bolokehile mme di ke ke tsa hlahisa kotsi ya letho bophelong ha eba di sebediswa ka nepo ho ka fumanwa tsebo ka -
tshebediso ya ntho mosebetsing kotsi e ka hlahang bophelong kapa polokehong e amanang le tshebediso ya ntho eo maemo a hlokehang ho etsa bonnete ba hore ntho eo e sebediswa hantle mme e ke ke ya ba kotsi bophelong ha eba e sebediswa hantle ka nepo tsela ya tshebetso ha kotsi e se e hlahile.
Ha eba motho eo ntho e itseng a e rekiseditsweng kapa a e fuweng, a itlama ka ho ngola le ho nka mehato e le ho etsa bonnete ba hore ntho eo e tla sebediswa hantle mme e tla bolokeha mme e ke ke ya hlahisa kotsi bophelong, mesebetsi ya ba amohelang thepa e rometsweng, bataki, morekisi, motshehetsi kapa mohlahisi e tla fetolelwa qetellong ho ba ya motho ya itlamang ho nka mehato ena.
Mesebetsi e akaretsang ya mosebetsi
Ke mosebetsi wa mosebeletsi ho:
hlokomela hore bophelong ba hae bo bolokehile hantle esita le bophelo ba batho ba bang ba ka tshwaetswang ke diketso tsa hae kapa ho se be le boikarabelo ba hae. Hona ho akaretsa ho bapala mosebetsing. Batho ba bangata ba tswile dikotsi mme ba bang ba bile ba hlokahetse ka lebaka la ho bapala mosebetsing mme hona ho nkuwa e le tlolo e kgolo ya molao.
ha Molao o tlama mosebeletsi ho phetha mosebetsi le ho sebedisana hantle le monnga mosebetsi tsebisa mohlahlobi wa Lefapha la Mesebetsi ha eba ho hlokeha jwalo ho phethahatsa taolo ya molao ya monnga mosebetsi kapa motho ya nang le tokelo e jwalo e beilweng ho latela bophelo bo botle le polokeho ho ikamahanya le melawana le ditsela tsa tshebetso tseo a di fuwang ke monnga mosebetsi ho apara meaparo ya polokeho kapa ho sebedisa thepa e tshwanelang ya boipoloko moo ho hlokehang jwalo ho tsebisa ka potla e kgolo ha eba ho na le maemo a hlobaetsang bakeng sa monnga mosebetsi kapa moemedi wa bophelo le polokeho ha eba yena ka boyena a bile le seabo ketsahalong e ka amang bophelo ba hae kapa ya baka hore a lemale, o lokela ho tsebisa monnga mosebetsi, motho ya nang le tokelo e jwalo kapa moemedi wa bophelo le polokeho ka potlako e kgolo ka tsietsi eo pele a tjhaisa tjhafong eo a e sebetsang.
Ditokelo tsa mosebetsi
Molao wa Bophelo bo botle le Polokeho Mesebetsing e entse hore ho eketswe ditokelo tsa basebetsi hore di kenyeletse tsena tse latelang:
Tokelo ya ho tseba
Mosebetsi o lokela ho ba le hona ho sebedisa -
Molao le melawana ya Bophelo bo botle le Polokeho Mesebetsing
Melao le ditsela tsa tsebetso tsa bophelo bo botle dibakeng tseo ho sebeletswang ho tsona
Maemo a bophelo le polokeho ao monnga mosebetsi a lokelang ho a boloka sebakeng seo ho sebeletswang ho sona
Mosebeletsi a ka kopa monnga mosebetsi ho mo tsebisa ka -
dikotsi tse amang bophelo le polokeho sebakeng seo ho sebeletswang ho sona mekgwa ya boipoloko e lokelang ho sebediswa ditsela tse okelang ho sebediswa di lokela ho latelwa ha eba mosebetsi a sebetsa dinthong tse kotsi bophelong ba hae
Mosebetsi a ka kopa hore ngaka ya hae ya lelapa e ke e hlahlobe direkoto tsa maemo a bophelo mabapi le tshebediso ya meriana.
Ha eba mosebetsi e le moemedi wa bophelo bo botle le polokeho, a ka hlahloba mme a hlahisa maikutlo ka ho ngola mabapi le dipehelo tsa dihlahlobo tsa hae
Tokelo ya ho le seabo dihlahlobong
Ha eba mosebetsi e le moemed wa bophelo bo botle le polokeho, a ka tsamaya hammoho le mohlahlobi wa b ophelo le polokeho ho tswa Lefapheng la Mesebetsi nakong ya dihlahlobo tsa dibaka tseo ho sebeletswang ho tsona le ho arab a potso efe kapa efe e ka botswang mohlahlobi.
Tokelo ya ho hlahisa maikutlo ka ho beha melao esita le ho etsa dipontsho
Mosebetsi a ka hlahisa maikutlo kapa a etsa dipapiso mabapi le molawana ofe kapa ofe kapa maemo a polokeho a phatlalatswang e le karolo ya Molao wa Bophelo bo botle le Polokeho.
Tokelo ya ho se etswe phofu
Monnga mosebetsi ha a lokela ho leleka mosebetsi mosebetsing, a fokotsa moputso wa mosebetsi kapa a fokotsa melawana ya mosebetsi e amang mosebetsi hobane -
mosebetsi a hlahisitse ditaba tseo a di hlokwang ho laela Molao ho motho ya nang le tokelo ya bolaodi ba Molao wa Bophelo bo botle le Polokeho mosebetsi o ikamahanya le tsebiso ya molao (mohlala: thibelo, tsebiso ya tlolo ya molao, jwalojwalo)
mosebetsi o entse ntho eo ho latela Molao e neng e lokela ho etswa mosebetsi ha a etsa ntho eo ho latela Molao e thibetsweng hore e etswe mosebetsi o fane ka bopaki ka pela lekgotla la dinyewe kapa Lekgotla la Mesebetsi ka ditaba tse amang bophelo le polokeho.
Tokelo ya ho ipiletsa
Mosebetsi a ka hlahisa boipiletso ba hae kgahlano le qeto ya mohlahlobi. Boipiletso bo lokela ho romelwa ka lengolo ho Mohlahlobi e Moholo, Bophelo bo botle le Polokeho, lefapha la Mesebetsi, Mokotla wa Poraevete X117, Pretoria, 0001.
Mosebetsi wa ho se sitise kapa ho sebedisa ka phoso dintho
Ha ho motho ya nang le tokelo ya ho sitisa kapa a sebedisa hampe ntho efe kapa efe e sebedisetswang bophelo le polokeho. Motho o lokela hore, ha re tea mohlala, a se ke a tlola ntho e mo tshireletsang ha a sebetsa ka motjhini mme ebe o sebetsa ka motjhini oo kapa a dumelle motho ofe kapa ofe hore a sebetse ka motjhini oo a sa sebedise setshireletsa seo.
Baemedi ba bophelo bo botle le polokeho
Ho bolelwa eng ka baemedi ba bophelo bo botle le polokeho
Ke basebetsi ba nako tsohle ba thontsweng le ho kgethwa ka ho ngola ke monnga mosebetsi ka mora hoba monnga mosebetsi ole basebetsi ba tsebisane mme ba fihlelle tumellano ka hore ke bomang ba tla ba baemedi ba bophelo le polokeho. Ho feta mona ba lokela hore bonyane ba be le tsebo ka maemo a karolo ya sebaka seo se ba sebeletsang ho sona e leng seo ba se kgethetsweng. Tumellano eo e lokela ho etswa nakong ya tshebetso ya ofisi le mesebetsi ya moemedi wa bophelo le polokeho mme e lokela ho etswa pakeng tsa monnga mosebetsi le basebetsi.
Ho lokela ho kgethwa baemedi ba bophelo le polokeho ba bakae ka palo
Ho lokela ho kgethwa moemedi a lemong bakeng sa sebaka sa tshebetso ka seng se nang le basebetsi ba mashome a mabedi kapa ho feta. Ka lebaka le jwalo, ha eba ho na le basebetsi ba leshome le metso e robong, ha ho hlokehe hore ho kgethwe moemedi sebakeng seo.
Malebana le mabenkele le diofisi, ho lokela ho kgethwa moemedi a le mong bakeng sa basebetsi ba bang le ba bang ba lekgolo kapa karolo ya bona. Ha re tea ka mohlala, ho lokela ho kgethwa moemedi a le mong ha eba ho na le basebetsi ba mashome a mebedi a motso o mong ho isa ba lekgolo. Le ha ho le jwalo, ho lokela ho kgethwa baemedi ba babedi ha eba palo ya basebetsi ba amohetsweng mosebetsing e tloha ho lekgolo le nang le motso o le mong ho isa ho makgolo a mabedi, jwalojwalo.
Malebana le dibaka tse ding tsa mosebetsi ho ka kgethwa moemedi a le mong bakeng sa basebetsi ba bang le ba bang ba mashome a mahlano kapa karolo ya bona. Ha re tea ka mohlala re fuman hore moemedi a le mong o lokela ho kgethwa bakeng sa basebetsi ba mashome a mabedi a motso o mong ho isa ho ba mashome a mahlano. Le ha ho le jwalo, ho lokela ho kgethwa baemedi ba moo ho nang le basebetsi ba mashome a mahlano a motso o mong ho isa ho ba lekgolo.
Ha e le ha maemo a tlama jwalo mohlahlobi a ka kopa hore ho kgethwe bamedi ba babedi le ha palo ya basebetsi e le ka tlase ho mashome a mabedi. Ha re tea ka mohlala, ho ka etsahala hore sebopeho sa tshebetso se be ka tsela eo ho kgethwa ha moemedi a le mong feela bakeng sa basebetsi ba mashome a mahlano ho sa lekanang. Mohlahlobi a ka kopa he hore ho amohelwe baemedi ba bang ba bangata. Le ha ho le jwalo, ha monnga mosebetsi le basebetsi ba dumela jwalo, ho ka kgethwa baemedi ba fetang palo e lebeletsweng .
Ho lokela hore ho kgethwe baemedi ba bophelo le polokeho neng?
Ho lokela ho kgethwa baemedi ba nakong ya dikgwedi tse nne kgwebo ya monnga mosebetsi e qadile. Monnga mosebetsi ya nang le palo ya basebetsi ba mashome a mabedi mme kgwebo ya hae e sebetsa nako e ka tlase ho dikgwedi tse nne, ha a lokela ho ba le baemedi. Ha eba ka mohlomong ha re tea ka mohlala re fumana hore ho amohelwa basebetsi ba dinako tse itseng polasing mme ba etsa hore palo ya basebetsi e ngatafale ho feta mashome a mabedi empa e le nakong e ka tlase ho dikgwedi tse nne, ha ho a tshwanelwa ho kgetha baemedi.
Ke eng se ka etswang ke baemedi ba bophelo le polokeho
Bamedi ba bophelo le polokeho ba na le tokelo ya ho etsa tsena tse latelang:
Ho fumana dipalopalo tsa bophelo le polokeho
Bamedi ba ka hlahloba bohlokwa le molemo wa ditsela tsa ho baballa bophelo le polokeho ka ho sebedisa dipalopalo tsa bophelo le polokeho
Ho lemoha kotsi e ka nnang ya hlaha
Baemedi ba ka lemoha kotsi e ka nnang ya hlaha mme ba e tsebahatsa ho komiti ya bophelo bo botle le polokeho kapa ho monnga mosebetsi.
Ho hlahloba diketsahalo
Bamedi hammoho le monnga mosebetsi ba ka hlahloba diketsahalo, ba hlahloba ditletlebo tsa basebetsi malebana le ditaba tse amang bophelo le polokeho mme ba di tsebahatsa ka tsela ya mangolo.
Ho phethahatsa boemedi
Bamedi ba ka emela polokeho ya basebetsi ho monnga mosebetsi kap ho komiti ya bophelo le polokeho kapa ha eba bomedi boo bo sa sebetse hantle ba ke ba le boemedi ho mohlahlobi.
Dihlahlobo
Malebana le dihlahlobo, baemedi ba ka -
hlahloba sebaka seo ho sebeletswang ho sona ka mora hoba ba tsebise monnga mosebetsi hore ba tla etsa dihlahlobo tse jwalo ba ka ba le seabo dipuisanong le bahlahlobi sebakeng seo ho sebeletswang ho sona kapa ba etsa dihlahlobo tse jwalo hammoho le bahlahlobi.
ba ka hlahloba ditokomane ka tumello ya monnga mosebetsi, ba ka sebetsa hammoho le moeletsi wa tsa setekgeniki nakong ya dihlahlobo
Ho ba teng dikopanong tsa dikomiti
Baemedi ba na le tokelo ya ho ba teng dikopanong tsa dikomiti tsa bophelo le polokeho
Dikomiti tsa bophelo bo botle le polokeho
Sepheo sa dikomiti tsa bophelo le polokeho ke sefe
Ditho di kopana ho thakgola, ho ntshetsa pele, ho baballa le ho lekola mekgwa e sebediswang ho etsa bonnete ba hore bophelo le polokeho ya basebetsi e ba teng.
Dikomiti tsa bophelo bo botle le polokeho di lokela ho thehwa neng?
Ho lokela hore bonyane ho thehwe komiti e le nngwe ha ho amohetswe baemedi ba babedi kapa ho feta.
Komiti ya bophelo le polokeho e na le ditho tse kae ka palo?
Monnga mosebetsi ke yena ya behang palo ya ditho tsa komiti ho latela dintlha tsena tse latelang;
ha eba ho na le komiti e le nngwe e thehilweng bakeng sa sebaka se itseng sa mosebetsi, baemedi bohle e lokela ho ba ditho tsa komiti eo ha eba ho thehilwe dikomiti tse pedi kapa ho feta bakeng sa sebaka se le seng sa tshebetso, moemedi e mong le e mong o lokela hore bonyane e be setho sa e nngwe ya dikomiti tseo.
Ka tsela e jwalo, moemedi e mong le e mong e lokela ho ba setho sa komiti. Monnga mosebetsi a ka thonya batho ba bang ho mo emela komiting empa batho bao ba thontsweng ke monnga mosebetsi ha ba tshwanela ho feta palo ya baemedi ba kgethilweng komiting eo. Ha eba mohlahlobi a utlwisisa hore palo ya dikomiti sebakeng seo ho sebetswang ho sona ha e a lekana, a ka nna a laela hore ho thehwe dikomiti tse ding tsa tlatsetso.
Baemedi ba bophelo le polokeho ba kopana makgetlo a makae?
Ba kopana ha eba ho na le lebaka le qosang hore ba etse jwalo, empa ba lokela hore bonyane ba kopane dikgweidng tse ding le tse ding tse tharo. Komiti e tla kgetha nako le sebaka bakengsa kopano. Le ha ho le jwalo, ha eba palo e ka bang diphesente tse leshome ya basebetsi e kopa mohlahlobi hore ho be le kopano, mohlahlobi a ka laela hore kopano e jwalo e be teng ka nako esita le sebakeng seo yena a tla se kgetha.
Ke mang ya laolang tsamaiso nakong ya dikopano?
Ditho tsa komiti di kgetha modulasetulo mme di hlalosa nako eo a tla e sebetsa ya ofisi, mekgwa ya tsamaiso ya dikopano, jwalojwalo.
Na dikomiti tsa bophelo le polokeho di ka kopa keletso ho ditsebi?
E, dikomiti di ka kenyeletsa batho ba itseg hore ba sebetse jwalo ka baeletsi mme e le ditho tse nang le boitsebelo bo phahameng malebana le ditaba tsa bophelo le polokeho. Le ha ho le jwalo, setho sa boeletsi ha se na tokelo ya ho vouta.
Ke eng se etswang ke dikomiti tsa bophelo le polokeho?
Dikomiti di sebetsana feela le ditaba tsa bophelo le polokeho sebakeng sa tshebetso kapa karolo ya sona e leng seo dikomiti tseo di se kgethetsweng. Ka kakaretso, dikomiti tsa bophelo le polokeho di na le mesebetsi ena e latelang:
Ho etsa dikgothaletso
Komiti e lokela ho etsa dikgothaletso ho monnga mosebetsi malebana le ditaba tsa bophelo le polokehoya basebetsi. Ha eba dikothaletso tsena di sa thuse bakeng sa ho rarolla bothata, dikomiti di ka etsa dikgothaletso mme tsa di lebisa ho mohlahlobi.
Ho bua ka diketsahalo
Komiti e lokela ho buisana ka ketsahalo efe kapa efe e bakang hore batho ba tswe dikotsi, ho kula, kapa lefu ho mosebetsi ofe kapa ofe mme ba ka tsebisa mohlahlobi ka taba tsena ka lengolo.
Ho boloka direkoto
Komiti e lokela ho boloka direkoto tsa dikgothaletso ho monnga mosebetsi esita le pehelo efe kapa efe ho mohlahlobi.
Ditho tsa komiti di lokela ho etsa mesebetsi efe kapa efe eo ba lokelang ho e etsa ho latela molawana.
Diphokotso
Monnga mosebetsi ha a lokele ho fokotsa moputso wa mosebetsi malebana le seo a lokelang ho se etsa molemong wa bophelo le polokeho le ho latela Molao.
Pehelo e iswang ho Mohlahlobi e Moholo malebana le malwetse a hlahileng mosebetsing
Ha eba ngaka e hlahlobile mosebetsi kapa e mo alafa bakeng sa bolwetse boo a nahanang hore bo qadile hona moo sebekang seo mosebetsi a sebetsang ho sona, ngaka eo e lokela ho etsa pehelo e lebiswang ho monnga mosebetsi esita le ho Mohlahlobi e Moholo.
Tshebedisano le mohlahlobi
Ho ikobela ditaelo, dikahlolo, dikopo le dikgalemelo
Bannga ba mesebetsi le basebetsi ba lokela ho ikobela ditaelo, dikahlolo, dikopo le dikgalemelo tse tswang ho bahlahlobi. Ho feta moo, ha ho motho mang kapa mang ya lokelang ho thibela e mong ho ikobela tsena tse boletsweng.
Ho araba dipotso
Dipotso tsa mohlahlobi di lokela ho arajwa empa ha ho motho ofe kapa ofe ya tlamellwang ho araba potso ka tsela e tla mo etsa hore e be o molato ka ho etsa jwalo. Ho iketsa ya molato ke ho bolela hore o na le boikarabelo tlolong ya molawana
Diphuputso
Ha mohlahlobi a batla jwalo, o lokela ho thuswa ka tse hlokehang kapa a thuswe ka tsela e nngwe e itseng bakeng sa ho etsa diphuputso. Mohlahlobi a ka kopa hape hore batho ba tle diphuputsong tsa hae. Ha ho motho ya dumellwang ho halefisa mohlahlobi kapa a leka ho mo thibela diphuputsong tsa hae.
Diqoso
Ha mosebetsi a etsa ntho e itseng eo ho latela Molao wa Bophelo bo botle le Polokeho e tadingwang e le tlolo ya molao, monnga mosebetsi ke yena ya jarang boikarabelo ba tlolo eo ya molao, mme a ka fumanwa a le molato kapa a ahlolwa ha e se feela ha a ka paka hore:
ha a ka a fana ka tumello e jwalo o entse mekutu yohle ho thibela taba eo mosebetsi ha a ka a sebetsa ka tsebo ya hae, ka mantswe a mang, mosebetsi o entse seo a tsebang hantle hore ha a tshwanela ho se etsa.
Taba ena e ama hape tumello ya monnga mosebetsi ha ka mohlomong re tea ka mohlala, rakontraka e monyenyane o lokela ho botsisisa. Bobedi ba bona ba lokela ho dumellana ka ho ngola tumellano ya bona fatshe hore na tumello eo e tla phethahatswa jwang ho latela Molao.
Thuso ya mohlahlobi
Bahlahlobi ba ka fumanwa diofising tsena tse latelang tsa Lefapha la Mesebetsi:
Porovense ya Leboya Founu: 290 1744
Molaodi wa Porovense Fekese: 290 1670
Porovense ya Mpumalanga Founu: 655 8700
Molaodi wa Porovense Fekese: 690 2622
Lefapha la Mesebetsi
Porovense ya Gauteng Leboya Founu: 309 5000
Molaodi wa Porovense Fakese: 323 5449
Lefapha la Mesebetsi
Lebokose La Poso 393
Porovense ya Gauteng Borwa Founu: 497 3000
Lefapha la Mesebetsi Fekese: 834 1081
Lebokose La Poso 4560
JOHANNESBURG
Molaodi wa Porovense Fekese: 447 9353
Lefapha la Mesebetsi
Lebokose La Poso 522
BLOEMFONTEIN
Porovense ya Leboya Bophirimela Founu: 384 2033
Molaodi wa Porovense Fekese: 384 2745
Lefapha la Mesebetsi
MMABATHO
Porovense ya Ha Zolo Natala Founu: 336 1500
Molaodi wa Porovense Fekese: 307 6882
Lefapha la Mesebetsi
Lebokose La Poso 940
DURBAN
Porovense ya Kapa Leboya Founu: 838 1500
Molaodi wa Porovense Fekese: 832 4798
Porovense ya Kapa Botjhabela Founu: 701 3000
Molaodi wa Porovense Fekese: 43 9719
Lefapha la Mesebetsi
Porovense ya Kapa Bophirima Founu: 460 5911
Molaodi wa Porovense Fekese: 465 7318
Lefapha la Mesebetsi
Lebokose La Poso 872
Aterese ya ofisi e kgolo ya Bolaodi bo boholo ba Bophelo bo botle le Polokeho Mesebetsing
Lefapha la Mesebetsi Founu: 309 4774
